Base sa public announcement sang lokal nga panguluhan sang La Carlota City, nga nakasulod ang Delta variant sa ciudad.
Ang carrier amo ang isa ka LSI gikan sa Oton, Iloilo nga sadto ginsiling sang provincial border officials nga nagpadulong ini sa Bago City sa diin, siya ang gin-swab sa port sadtong Agosto 1,2021.
Apang, nahibaluan nga wala nagkoordinar ang carrier sa LGU-La Carlota agud kuntani e-quarantined.
Sa baylo, nagrikta ini pauli sa isa ka Barangay sa ciudad sang La Carlota.
Sadtong Agosto 2 naguwa ang iya positive RT-PCR test sa diin, nagkoordinar ang probinsya kag LGU agud pangitaon ang pasyente sa Bago City apang wala nila ini makita.
Apang, sa amo man nga adlaw, nakita sang LGU-La Carlota ang carrier sa isa ka barangay sa ciudad.
Gilayon ini nga gindala sa LGU isolation facility kag siya ang asymptomatic.
Matapos ang 10 days sang isolation kag ang pag-release sang negative result sang iya repeat swab test, ginpahanugutan ini nga makapauli sadtong Agosto 11.
Samtang, wala naman sang nalatnan sa iya mga himata kag tanan nangin negative sa RT-PCR test.
Apang, sang tinalikdan nga gab-e, ginpabalo sang Provincial Health Office (PHO) ang alkalde sang ciudad sang La Carlota nga naguwa sa genome sequencing sa RT-PCR sang carrier nga siya ang infected sa COVID Delta variant.
Gilayon man nga nag-instruct si Mayor Rex Jalando-on sa Barangay kag COVID Team nga ipaidalom ang LSI pati man ang bilog sini nga pamilya sa lockdown kag nagmandu sang repeat swab test subong nga adlaw, Agosto 30.
Angot sini, padayon naman nga naga-apelar si Mayor Rex Jalando-on sa iya pumuluyo nga dapat magkooperar kag dapat magsunod sa travel and health protocols agud maprotektahan ang bilog nga La Carlota City.
