Ginapahalong sang Department of Health (DOH) ang publiko batuk sa mga lamok nga nagadala sang dengue sini nga tig-ilinit bangud wala ini may ginapili nga tion sa pagpalapta sang balatian.
Sa report sang Pilipino Star Ngayon, ginpahayag ni DOH Officer-in-charge Maria Rosario Vergeire nga madamo ang naga-ekspektar nga kada tig-ululan lamang naga-atake ang mga lamok nga may dengue.
Ginpaathag sini nga kada tig-ilinit kun san-o nagakulang ang suplay sang tubig, kalabanan sa mga tawo nagatipon sang tubig sa drum, labador, kag balde nga wala ginatakluban. Bangud diri, nagapangitlog ang mga lamok kun nangin “stagnant” na ang tubig.
Humalin Enero 1 tubtob Marso 18, nakarecord na ang Pilipinas sang 27,670 nga kaso sang dengue. Mas mataas ini sang 94% kumparar sa narecord nga 14,278 sadtong nagligad nga tuig sa pareho nga bulan.
Kalabanan sa bag-o nga kaso amo ang narecord sa National Capital Region (3,898), Central Luzon (3,053), kag Davao Region (2,707).*
