Dakup ang isa ka drayber sa ginpatigayon nga buy-bust operation sa Purok 1, Barangay Magallon Cadre, banwa sang Moises Padilla, Negros Occidental takna la 1:25 sang udto sini nga Miyerkules, Abril 23.
Ginkilala ang subject kay Joeman Albios, 29-anyos, ginakabig Newly Identifed Street Level Individual (SLI), kag residente sang Had. Cecilia, Barangay Corssing Magallon sa nasambit nga banwa.
Suno sa report sang Moises Padilla Municipal Police Station, nakumpiskar kay Albios ang tatlo ka pakete sang ginasuspetsuhan shabu nalakip na ang buy-bust item, P500 nga marked money, isa ka disposable lighter nga nagaduag puti, kag isa ka empty pack sang Winston Cigarette.
Ginabulubanta nga nagabug-at sang 10 ka gramos kag nagabalor sang P68,000 ang nakumpiskar nga suspected shabu.
Yara na sa kustodiya sang Moises Padilla MPS si Albios nga magapangatubang sa kaso nga paglapas sa RA 9165 ukon Comprehensive Dangerous Drugs Act of 2002.*