Warning: graphic content
VALLADOLID, NEGROS OCCIDENTAL – Patay ang 47-anyos nga drayber sang traysikol sa nagluntad nga aksidente sa Purok Katilingban, Brgy. Sagua Banwa, banwa sang Valladolid takna las-3:30 sang hapon sang Domingo, Nobyembre 27.
Ginkilala ang napatay kay Sunday Villar, may asawa kag residente sang Brgy. Zone 6 sa banwa sang Pulupandan.
Base sa inisyal nga imbestigasyon, imbes nga magliko sa kurbada nga alagyan ang traysikol, nagdiretso ini sa pihak nga bahin sang dalan kag nabungguan ang nagapadulong nga traysikol nga may pasahero nga mag-iloy.
Bangud sa impact sang pagkabunggo, nadagdag ang drayber kag posible nga naigo ang ulo sini sa matig-a nga bagay nga amo ang gintunaan sang iya kamatayon.
Samtang ang drayber kag mga pasahero naman sang isa pa ka traysikol nga nabungguan sini ang nakaangkon sang minor injuries.
Nahibaluan nga nagikan si Villar sa bulangan kag magapauli na kuntani sa iya puluy-an. Suno sa iya mga abyan, nakainom ini sang makahulubog nga ilimnon kag ginpunggan nila ini nga magmaneho sang iya traysikol apang nagpamilit ini nga magpauli.