Warning: graphic content
VALLADOLID, NEGROS OCCIDENTAL – Dead-on-arrival ang 54-anyos nga lalaki nga gina-alegar may diperensya sa paminsaron matapos ini mabungguan sang de-pasahero nga salakyan sa Purok Masagana, Brgy. Bagumbayan, banwa sang Valladolid las-4:45 sang kaagahon sang Sabado, Nobyembre 26.
Ginkilala ang biktima kay Inocencio Baylon nga residente sang Sitio Dolom, Brgy. San Miguel, sa siudad sang La Carlota.
Base sa imbestigasyon sang kapuliusan, padulong sa norte nga bahin ang salakyan sang hinali nga nagtabok ang biktima.
Bangud diri, nakaangkon sang pilas sa nagkalain-lain nga bahin sang iya nga lawas ang biktima nga gilayon nga gindala sa Valladolid District Hospital apang gindeklarar ini nga dead-on-arrival.
Yara ang salakyan kag drayber sini sa kustodiya sang Valladolid Municipal Police Station samtang nagpalab-ot naman sang bulig ang tag-iya sang salakyan sa mga himata sang biktima.
