Ginbawian sang kabuhi ang gina-alegar miembro sang Communist Party of the Philippines–New People’s Army (CPP-NPA) nga naka-engkwentro sang 61IB sa Sitio Pagas, Brgy. Ayabang, Leon, Iloilo sang Sabado, Hulyo 29, 2023.
Suno sa 61st Infantry (Hunter) Battalion sang Philippine Army, nakabaton sila sang impormasyon gikan sa mga residente nga may yara sang presensya sang armado nga grupo sa lugar, nga gina-alegar nagapangolekta sang kwarta kag pagkaon sa mga residente didto.
Ginkilala ang mga napatay nga sanday John Eric Talibo, 26-anyos kag residente sang Barangay Indaluyon, Igbaras, kag si Jenny Fariolan sang Cabalaunan, Miaao nga gina-alegar sa idalom sang Sibat (SYP) Platoon, Southern Front- Kometing Rehiyon- Panay sang CPP-NPA.
Naglawig sang lima ka minuto ang engkwentro sang duha ka grupo nga nagresulta sa pagkapatay sang duha ka NPA.
Narekober sa lugar ang pila ka mga gamit kalakip na ang home-made M16 rifle, duha ka shotguns (home-made), isa ka caliber .45 pistol, isa ka anti-personnel mine, anom ka blasting caps, isa ka detonating switch, duha ka electrical cords, apat ka backpacks, NPA flag, medical paraphernalia, kag mga dokumento.
Nagapasalamat naman ang military sa kooperasyon nga ginhatag sang publiko sa madinalag-on nga operasyon kag liwat nga ginganyat ang nabilin nga miembro sang rebelde nga grupo nga magsungka na sa gobyerno.*
