Earplug nagsulod kag nagsupon sa dalunggan sang lalaki sa lima ka tuig

Lima na ka tuig nagaka-eksperyensya sang pagkabungol ang isa ka lalaki sa U.K. matapos nagsulod kag nagsupon ang isa ka earplug sa iya dalunggan.

Bilang isa ka royal navy veteran, ginpapatihan ni Wallace Lee nga ang rason sang iya pagkabungol amo ang masami nga pag-obra niya malapit sa mga helicopter.

Apang, nadumduman niya sadtong nagligad nga lima ka tuig, nagsuksok siya sang earplugs bangud nagbiyahe ini sakay sang eroplano padulong sa Australia.

Bangud diri, nagpakonsulta siya sa EENT Doctor kag didto niya nahibaluan nga isa ka earplug ang nagsupon sa iya dalunggan rason nga nabungol ini.

Nakuha naman ang nasambit nga earplug sang espesyalista kag matapos ang simple nga operasyon, nakabati na sa liwat si Lee.

via BBC