“Wala ko ya nagkulang sa paghambal sa iya, galing kay gintuman ya gid ang gusto niya. Palangga ko gid na siya katama,” suno sa iloy nga si Antonia Porras, 65 anyos angut sa kamatayon sang iya anak.
Sa exclusive interview sang Radyo Bandera Bacolod, gin-ako ni Antonia nga nagagamit sang illegal nga droga ang anak nga si John King Porras, 34 anyos, nga ginluthang-patay kahapon sang gab-i Hunyo 10 sa Galo Street, Brgy. 12 syudad sang Bacolod.
Suno kay Antonia, siya mismo ang nagpa-‘tokhang’ sa iya nga anak sang tinalikdan nga tuig bangud luyag niya nga bag-o na ang kabuhi ni John King.
Apang apisar sa iya mga panugyan, padayon sa gihapon nga nagagamit sang illegal nga droga ang iya anak nga si John King.
Suno sa pamilya Porras, apisar nga nagagamit si John King, mabuot siya nga tawo kag wala sang kontra. Nagapanawagan naman sang hustisya ang iloy sa kamatayon sang iya anak.
“Hustisya lang gid ang ginapangayo namon nga pamilya kabay pa nga madakpan nila ang naghimo sini sa iya.”
