Ginpatigayon na ang “preliminary investigation” angut sa kaso nga illegal possession of firearms and explosives batuk kay Congressman Arnolfo Teves sa Department of Justice (DOJ).
Nagtambong sa nasambit nga imbestigasyon ang abogado ni Congressman Teves nga si Atty. Ferdinand Topacio, nga wala ang iya kliyente.
Suno kay Topacio, nabaton nila ang subpoena sang tinalikdan nga semana kag kinahanglan pa nila ang dugang nga panahon, agud makatipon sang ebidensya.
Ginpasaka ang reklamo batuk kay Teves, matapos nga ginpatigayon ang “raid” sa puluy-an sang mga Teves, sa Bayawan City, Negros Oriental sang tinalikdan nga Marso 10.
Suno sa mga otoridad, ila nakuha ang mga armas kag explosives sa nasambit nga raid.
Nagapati naman ang kampo ni Teves nga “planted” ang nakuha nga mga armas kag bala sa puluy-an sang pamilya Teves.
Ginpalayag ni Atty. Topacio, nga sang Disyembre 22, tinalikdan nga tuig, nakabaton na sang impormasyon si Congressman Teves nga ipatigayon ang raid sa ila puluy-an kag e frame up ang kongresista.
“Kasi December 28, 2022 pa pinost na ni Cong. Teves sa kanyang Facebook account ang kanyang reklamo na may nakuha siyang reklamo na re-raidin ang kanyang mga tahanan at lalagyan ng ebidensiya in order to frame him up,” suno kay Atty.Topacio.*
