Nagpositibo sa COVID-19 ang isa ka police personnel sang Negros Occidental Provincial Police Office nga na-asign sa isa ka Hotel Quarantine Facility sa ciudad sang Bacolod kon sa diin nahamtang ang mga Returning Overseas Filipino ukon ROF.
Sa exclusive interview sang Radyo Bandera kay Police Major Edison Nabayra Garcia, Police Information Officer sang NOCCPO iya sini ginhambal nga ang nasambitan nga pulis ang na-asign man sa 1st Provincial Mobile Force Company.
Suno pa kay Garcia nga protocol sang ila nga pamunuan nga kung mag leave ukon mapauli ang ila nga personnel nga naka-asign sa mga quarantine facility ginapaidalum ang mga ini sa swab-test ilabi nagid kung may yara sang nagpositibo sa nasambitan nga pasilidad.
Posible suno kay Garcia nga sa pasilidad man nakuha sang pulis ang virus, apang nagapabilin ini nga asymptomatic kag yara sa karon sa provincial quarantine facility kag nakatalana nga pagakuwaan na naman sang swab-test matapos ang 14-diyas nga pag-isolate.
Nahibaloan nga ini ang ikaduha nga kaso sang nagpositibo sa COVID-19 sa nasambitan nga talatapan.
Nagpanugyan man si Garcia sa mga pumuluyo nga padayon lang nga magsunod sa mga health safety protocol kag kung mahimo mag stay home lang agud malikawan ang paglapta sang makahalalit nga virus.
