BACOLOD CITY – Nagdangat sa masobra P20 milyones ang balor sang kahalitan sang sunog nga naglawig sang malapit walo ka oras sa Downtown Area, dalan Luzuriaga, siudad sang Bacolod sang Domingo, Pebrero 12.
Base sa report sang Bacolod City Fire Station, nagdangat sa 2nd Alarm ang sunog nga nagsugod takna las-8:30 sang aga kag naglawig tubtub gindeklarar ang fire out las-4:14 sang hapon.
Suno kay Chief Inspector Rodel Legaspi, city fire marshall sang Bureau of Fire Protection (BFP) Bacolod, nangin mabudlay ang pagsulod sa establisyemento bangud napuno ini sang mga karton kag stocks nga nagabalabag sa alagyan.
Indi magnubo sa siyam ka fire trucks sang BFP kag iban pa nga fire brigades ang nagresponde sa nagluntad nga sunog.
Naghalin ang sunog sa Jean’s Boutique nga ginapanag-iyahan ni Jean Lumauag kag nakalambut ini sa Wan Li Marketing nga ginapanag-iyahan naman ni Alex Choi.
Nangin emosyonal naman ang tag-iya sang Good Choice Appliance matapos maulamid ang iya baligyaan.
Ginpahayag sang tag-iya nga bag-o lamang na-deliver ang stocks sang ila baligyaan.
Ginabulubanta nagdangat sa P20,234,400 ang kahalitan nga ginbilin sang nasambit nga sunog apang masuwerte nga wala sang nasamaran.
Nagapangabay ang firefighters sa business owners nga indi pagbalabagan ang mga hallway kag alagyan sang stocks ukon mga karton bangud nagapabudlay ini sa ila pagresponde pananglitan may matabo nga sunog.