BACOLOD CITY– Arestado ang isa ka lalaki matapos ginserbehan warrant of arrest sang kapulisan kagab-i, Mayo 18, 2023 sa kaso nga 2 counts of rape kag child abuse sa Barangay Alangilan, Bacolod City, Negros Occidental.
Naga-edad sang 48-anyos ang lalaki, ginakabig nga Top 5 wanted person sa banwa sang Murica kag residente sang nasambit nga lugar.
Gin-aresto ang lalaki sang Murica Municipal Police Station, Bacolod City Police Station 5, 1st NOCPMFC kag Force Multipliers.
Gin-isyu naman ni Judge Maritess Gumahin sang Bacolod City 6th Judicial Region Branch 51 ang warrant of arrest sa kaso nga child abuse sadtong Hunyo 16, 2021 samtang gin-isyu naman ni Judge Phoebe Gargantiel-Balbin sang Bacolod City 6th Judicial Region Branch 41 ang warrant of arrest sa kaso nga 2 counts of rape sadtong Mayo 20, 2021.
May kabilugan naman nga P400,000 ang bail bond sang lalaki. Nakahunong naman sa Murcia MPS ang lalaki.*
