BACOLOD CITY – Nalipungan sa tunga sang dalan si Vicente Pingoy Jr., alyas “Vic-Vic,” 43-anyos matapos ini ang ginsumbag sang iya man lang kaingod sa Gan Subdivision, Barangay II Poblacion sa syudad sang La Carlota, Negros Occidental, takna las 5:30 sang hapon, Lunes, Agosto 15, 2022.
Apang, sang gindala si Pingoy sa Don Salvador Benedicto Memorial District Hospital, siya ang gindeklarar nga dead on arrival sang attending physician, sandig sa spot report sang Negros Occidental Police Provincial Office.
Nagpadulong sa La Carlota Police Station si January Llantos, 23-anyos, hinablos ni Pingoy, kag gin-alegar nga ginsumbag ang biktima ni Ralph John Molinos, alyas “Totox,” 23-anyos, kag residente man sang nasambit nga subdivision.
Sandig sa imbestigasyon, naglalisay sanday Pingoy kag Molinos nga nagresulta sa sumbaganay.
Sa ila pagbayluhanay sang inumol, natumba si Pingoy kag nalipungan sa tunga sang dalan.
Gindala na ang lawas ni Pingoy sa Holy Redeemer Funeral.
Takna las 9:10 sang gab-i, Lunes, Agosto 15, nagsungka si Molinos kaupod ang iya pamilya sa La Carlota Police Station.*
