Ginaangut sa Epogon Robbery Hold-up Group ang 55-anyos nga si Eduardo Cataraja nga ginsulod kag ginpatay sa iya puluy-an sa Purok Linya, Barangay Cabug sa ciudad sang Bacolod City, Lunes sang gab-i, Pebrero 22, 2021.
Suno kay Police Lt. Lanie Deriada, officer-in-charge sang Bacolod City Police Station 9, ila pa sa karon ginakumpirmar ang impormasyon nga ila nakuha sa mga tupad balay sang biktima nga may kaangtanan ini sa nasambit nga group.
Ini bangud sang tinalikdan nga tuig, nakit-an nga ginpatinir ni Cataraja ang nasambit nga grupo sa iya nga puluy-an sa sulod sang tatlo ka bulan.
Ginakumpirmar man sa karon sang mga otoridad, kun isa si Eddie Epogon, lider sang grupo nga napatay sa operasyon sang mga pulis sa ciudad sang Sipalay, ang isa man sa mga miyembro nga nakaistar sa balay sang biktima.
Ginpahayag man ni Deriada, nga wala pa sila sang motibo nga ginatutukan sa karon kag lead sa mga suspek nga nagpatay sa biktima.
Nahibaluan nga alas 10 Lunes sang gab-i sang ginsulod sang tatlo ka mga persona si Cataraja kag ginluthang sang makapila ka beses nga nag-igo sa nagkalain-lain nga bahin sang iya lawas nga amo ang gintunaan sang iya gilayon nga kamatayon.
Nagapanyapon si Cataraja sang ini ang ginluthang sang mga suspek nga naka-hood kag face masks.* – with reports from Jinn Siatita
