NEGROS OCCIDENTAL– Patay ang isa ka persona matapos ginhatok-hatok labo sang suspek nga iya man lang kaingod balay sa Purok Guinam-an, Barangay Minoyan, Murcia, Negros Occidental.
Ginkilala ang biktima kay Lito Hilado Pabrua, 42-anyos may asawa kag residente sang nasambit nga lugar.
Samtang, ginkilala naman ang suspek kay Francisco Belegorio Roce, 59-anyos may asawa kag residente sang kapareho nga lugar.
Sandig sa imbestigasyon sang Murcia Municipal Police Station nag luntad ang insidente takna las-10:00 sang gab-i sang tinalikdan nga Enero 22, 2023 sa puluy-an sang suspek.
Suno kay Police Senior Master Sergeant Goerge Romo imbestagador sang kaso takna las-5:00 sang hapon ginhagad ni Roce si Pabrua kaupod pa ang duha nga ginkilala kay alias “Ruben” kag “Dodoy” nga mag ihaw sang manok.
Samtang nagahanda sa pagluto ang suspek kaupod sanday Ruben kag Dodoy natulugan ang biktima, takna las-10:00 sang gab-i sang gilayon ini nagbugtaw bangud sa kinagamo.
Dugang pa ni Romo, pagbugtaw sang biktima may nagluntad nga kinagamo sa tunga nanday Roce kag Pabrua tubtob naglab-ot sa punto nga ginlabo sang makapila ka beses sang suspek ang biktima gamit ang binangon nga amo ang gintunaan sang hinali nga kamatayon.
Gilayon naman nag-sungka sa barangay ang suspek kag gin turn-over naman ini sang barangay sa Murcia PNP.
Sa interview sang Radyo Bandera Bacolod kay Francisco Roce sa sulod sang custodial facility sang Murcia PNP alagyan lang ang iya balay pakadto sa balay sang biktima.
Takna las-5:00 sang hapon sadtong Enero 22, naglabay ang biktima kaupod ang iya asawa sa ila balay kag nagpasilong bangud naga-ulan.
Suno pa sa suspek, gintanyag niya ang mag-asawa nga sa ila na lang balay manyapon bangud maga-ihaw ini sang manok.
Dugang pa sang suspek, nagkadto siya sa balay sang mag-utod nga sanday Ruben kag Dodoy agud magpabulig nga ihaw sang manok.
Nagakatulog naman ang biktima sang pagpauli sang suspek apang takna las-10:00 sang gab-i sang ini ang nagbugtaw gilayon nga ginsumbag kag gin sipa-sipa ang dingding sang balay sang suspek.
Dugang pa ni Francisco nagpakitluoy siya kay Lito nga untaton ang pagguba sa iya balay apang wala nag untat ang biktima rason na napikon si Francisco kag ginhatok-hatok sang labo ang biktima.
Base naman sa imbestigasyon sang Murcia PNP nga si Francisco amo ang nagpatay sa amay sang biktima sadtong 1988, napasakaan sang kaso si Francisco kag na priso sa Negros Occidental Provincial Jail sa sulod sang 8 ka tuig.
Ginalantaw naman sang Murcia PNP nga luyag mag timalos sang biktima sa suspek.
Detinado karon sa custodial facility sang Murcia MPS ang suspek samtang ginahulat pa ang asawa sang biktima nga magpasaka sang nagakaigo nga kaso batok sa suspek.
Ginpahayag naman ni Romo nga murder ang posible nga ipasaka nga kaso batok kay Roce.*
