Pilason ang isa ka lalaki nga nurse matapos maigo sang bala nga gikan sa ginpalupok nga armas-luthang sang isa ka katapo sang Naval Infantry of the Philippine Navy sa dalan Cabahug, Barangay Zone 2, syudad sang Cadiz, takna las 2:00 sang kaagahon sadtong Enero 22, 2023.
Ginkilala ang biktima nga si John Robert Sinoy, legal ang pang-edaron kag naga obra bilang isa ka nurse sa Cadiz Emergency Clinic.
Samtang ginkilala naman ang suspek kay John Emerson Dolino, 27-anyos, katapo sang Philippine Marines nga na-destino sa Tawi-Tawi kag residente sang Barangay Fabrica, syudad sang Sagay.
Sandig sa imbestigasyon sang Cadiz City Police Station, nagikan sa alumni celebration si Sinoy kaupod ang iya mga kakilala sang magpadulong sila sa Rosita’s restobar nga nahamtang sa nasambit nga lugar.
Samtang naga-inom sang makahulubog nga ilimnon si Dolino kaupod man ang iya mga abyan sa nasambit nga restobar.
Yara sa impluwensya sang makahulubog nga ilimnon si Sinoy sang wala sila nagka-inchindihanay sang iya kakilala.
Nagdesisyon naman si Dolino kag ang iya grupo nga magpauli na, apang sa guwa sang restobar, may nagluntad nga komosyon kag hinali na lamang ginsumbag ni Sinoy si Dolino.
Bangud diri, ginkuha ni Dolino ang iya dala nga armas-luthang nga isa ka .9mm pistol kag ginpalupok ini sang apat ka beses sa idalom nga direksyon sang dalan.
Bangud sa sementado ang dalan, nagbanda ang bala kag naigo ang kilid sang tiyan ni Sinoy kag gilayon man ini gindala sa Cadiz Emergency Clinic agud mahatagan sang medikal nga atensyon.
Matapos ang insidente hinali nga nagpalagyo si Dolino apang nadakpan naman ini sa ginpatigayon nga hot pusuit operation.
Sa karon, nakahunong na sa Cadiz City Police Station si Dolino nga magapangatubang sa kaso nga “Reckless Imprudence Resulting to Serious Physical Injury”.*
