METRO MANILA – Nagsumiter si Senator Christopher “Bong” Go sang proposal nga magamando sa Philippine Health Insurance Corporation nga maghatag sang libre nga dialysis sa tanan sini nga miyembro.
Luyag ni Go nga mapatigayon kag mapasanyog ang paghatag sang serbisyo sa ikaayong lawas kag pagahimuon nga accessible sa tanan nga Pinoy ang pasilidad sang ospital sa pungsod.
Sandig sa mga probisyon sang Universal Health Care Act kaangot sa pagtaas sang premium rates kag benepisyo sang dialysis, ginaduso ang “Libreng Dialysis Act of 2022.”
Magamando ini sa PhilHealth kaupod ang Health Technology Assessment Council nga maghimo sang “comprehensive package” sang benepisyo sang dialysis para sa mga Pinoy.
Kalakip diri ang libre nga bayad sa hemodialysis, peritoneal dialysis treatments, sessions kag procedures sang PhilHealth accredited-health facilities.
Ginaduso naman ni Go ang paghatag sang libre nga medical check-up kada tuig para sa tanan nga Pilipino kag pagpabaskog sa Emergency Medical Services System sa pungsod.
