Patay ang isa ka mangunguma matapos ginbuno-buno sang gina-alegar may deperensya sa paminsaron sa Brgy. Capt. Ramon syudad sang Silay kahapon sang aga, Marso 21.
Suno kay Lt. Gilmore Cuare, deputy chief of Police sang Silay PNP, naglabay lamang ang 57 anyos nga si Dante Orocio sang hinali na lamang ini nga ginbuno sang makapila ka beses sang suspek nga si Rafel Abarraintos Jr., 41 anyos, tupad balay man sang biktima kag lunsay residente sang nasambit nga lugar.
Dugang pa ni Cuare, nadakpan ang suspek sang katapo sang army matapos nga nagpabalo ang barangay kapitan sang insidente.
Base sa rekord sang kapulisan, nakaagi man preso ang suspek bangud ini siya ang ginreklamo matapos niya mapilasan ang isa man ka persona sang ini ang gin-atake sang iya ‘nervous breakdown’.
Ginsiling man sang kapulisan nga desidido ang pamilya sang biktima nga magpasaka sang kaso nga murder batok sa suspek.
Sa karon, yara pa gihapon sa kustodiya sang kapulisan ang suspek kag natalana nga ipaidalom sa inquest proceeding.
