Halin sa Kapilya sang Camp Wenceslao Vinsons, isa-isa na nga ginpauli sa ila puluy-an ang mga bangkay sang 5 ka katapo sang Camarines Norte 2nd Police Mobile Force Company nga napatay sa engkwentro sa mga rebelde sa Labo, Camarines Norte sadtong Marso 19 sang gab-e.
Ginkilala ang mga napatay sa “Dumagmang Encounter” nga sanday Patrolman Joey Cuarteros sang Tuguegarao City, Cagayan, Patrolman Benny Ric Bacurin sang Bgy. Guinacutan, Vinzons, Camarines Norte, Police Corporal Roger Estoy sang Bgy. Bagumbayan kag Patrolman Jeremy Alcantara sang Bgy. Uson sa Libmanan kag Patrolman Alex Antioquia sang Bgy. Colacling, Lupi sa Camarines Sur.
Pilason naman sanday PCpl. Eric Hermoso kag Pat. Aldrin Aguito nga lunsay taga Camarines Sur.Suno sa utod ni Antioquia, posible buhi pa kuntani ang iya utod kung nangin madasig lang ang pagpadala sang reinforcement sang Camarines Norte Police kag Philippine Army.
Gintukod na sang PNP ang Special Investigation Task Group Dumagmang para hibalo-on kung may kakulangan kag dapat may manabat matapos nga wala sang may nag-abot nga reinforcement sa gin-atake nga patrol base sang 2nd PMFC sa barangay.
Apang, una naman nga ginsiling ni PNP-Bicol regional director PBGen Bartolome Bustamante nga ambush, harassment kag raid ang nagluntad sadtong gab-e sang engkuwentro.
Ginkondenar naman sang Commission on Human Rights sa Bicol ang ambush kag magapatigayon sang separado nga imbestigasyon.
