BACOLOD CITY—Nakuhaan sang kapin P2.6 million nga balor sang ginasuspetsuhan shabu ang isa ka maritime student sa buybust operation nga ginpatigayon sang gintingub nga puwersa sang RSOG 6 nga ginpangunahan ni PLT. John Paul Tabujara, SOU 7, PNP DEG, NBI Bacolod District Office kag Bacolod City Police Station 2 sa Purok. Sigay Brgy. 2 alas-10:00 kaina sang aga.
Ginkilala ang subject sang operasyon nga si Dan Aldrick Ballesteros, 19-anyos, kag residente sang Purok Sigay sa amo man nga barangay.Ginapahayag nga si Ballesteros ang isa ka estudyante sa isa ka maritime academy sa siudad.
Nakuha sa paghinakop sini ang mga masunod: 1.)isa ka magamay nga heat sealed transparent plastic sachets nga may unod nga white crystalline substance nga ginapatihan shabu nga amo ang buybust item, 2.) 21 ka medium size heat sealed plastic nga may unod nga white crystalline substance nga ginapatihan shabu 3.) tatlo ka large size knot tied plastics nga may unod nga white crystalline substance nga ginapatihan iligal nga druga. Ang tanan nga mga items nga nakuha ang ginabulubanta nagabug-at sang 396 grams.
Lakip pa sa mga nakuha amo ang P1,000 nga buy bust money, kag isa ka weighing scale.Sa karon si Ballesteros ang yara na sa kustodiya sang NBI para sa nagakaigo nga disposisyon kag pagpasaka sang kaso.
