Nagsinapol sanday Negros Occidental Gov. Eugenio Jose “Bong” Lacson, incoming Bacolod City Mayor Alfredo “Albee” Benitez, pati ang City kag Provincial Director sang Lunes, Hunyo 20 bangud sa maka-alarma nga asud-asud nga shooting incidents sa syudad kag probinsya.
Isa sa gin-discuss sa nasambit nga meeting ang kooperasyon ukon pagbinuligay sang mga kapulisan sa syudad kag probinsya sa pagtapna sang kriminalidad.
Suno kay Gov. Lacson, ini ang patimaan nga may ara sang “harmonious working relationship” kag paghiusa sa tunga sang syudad kag probinsya sa madason nga tatlo ka tuig.
Dugang pa ni Gov. Lacson maka-alarma na ang asud-asud nga shooting incidents syudad sang Bacolod kun diin may siyam na ka insidente nga nagluntad humalin Hunyo 1 tubtob Hunyo 19.
Pinakaulihi nga biktima sang pagpaniro amu ang isa ka amay nga tricycle drayber nga si Christopher Guanzon nga ginluthang sa bahin sang Purok Sta. Ana, Brgy. 31, sa syudad sang Bacolod.
