Gina-imbestigaran karon sang Murcia Municipal Police Station ang posibilidad nga pareho lamang nga mga suspek ang responsable sa duha ka kaso ang panghold-up sa banwa sang Murcia damlag lang.
Sa interview sang Radyo Bandera Bacolod kay Police Staff Sergeant Edwin Celiz, investigator on case sang Murcia Police, ila ginalantaw nga posible pareho lang ang mga suspek nga ila ginapangita nga responsable sa paghold-up sa salesman sang sigarilyo kag driver sini sa Prk. Liero Brgy. Cansilayan tinalikdan nga adlaw kag sa una na nga kaso sang pangpanghold-up sa nasambit man nga banwa tinalikdan nga semana.
Suno kay Celiz, pareho ang pattern sang mga suspek sa pagpatigayon sang krimen sa diin sa tatlo sa ila, isa diri ang magatutok sang armas sa biktima kag magdeklarar sang hold-up, isa naman ang magasulod sa passenger seat kag magkuha sang mga bagay nga mahimo nila makwartahan samtang ang isa ang magaserbe nga look-out.
Dugang pa sang imbestigador, isa sa mga suspek ang nakilala ni Orlando Edeso, salesman sang PMFTC Fortune Tobacco nga isa sa mga biktima, pinaagi sa mga ginpakita nga litrato sa rogues’ gallery sang police station.
Sa karon, nagapadayon pa ang imbestigasyon sang kapulisan sa nasambit nga krimen.*
