SIPALAY CITY – Patay ang isa ka negosyante matapos gintiro sang wala pa makilal-an nga suspetsado sa Sipalay City, Negros Occidental sadtong Sabado sang aga.
Base sa live report sa Regional Network News sa Radyo Bandera, pasado alas-6 sang aga sang gintiro ang biktima nga nagabaligya sang livestock samtang pauli ini halin sa piggery sa Sitio Cambogui-ot.
Nakaangkon sang igo sang bala sa nagkalain-lain nga parte sang lawas ang biktima nga nangin rason sang iya kamatayon.
Suno sa una nga imbestigasyon, love triangle ang isa sa ginalantaw nga anggulo bangod gina-alegar may iban nga babaye ang biktima apisar nga ini ang may gina upod.
Posible man suno sa ila nga may kaangtanan sa negosyo ang krimen.
Samtang, nakuha sa crime scene ang 4 ka basiyo sang 9-mm pistol.
Kag padayon naman ang imbestigasyon sang mga otoridad sa identity sang suspetsado.