Sa pinakaulihi nga datus nga ginpaguwa sang Police Regional Office-6, ang probinsya sang Negros Occidental ang may pinakamadamo nga nagkaladakpan nga naglapas sa Comelec Gun Ban sa bilog nga Western Visayas.
Sa pakig-angut sang Rado Bandera kay P/Lt. Abegael Donasco, spokesperson sang Negros Occidental Police Provincial Office (NOCPPO), nagdangat na sa 22 ang mga nagkaladakpan sa nagkalain-lain nga siyudad kag banwa sa probinsya bangud sa paglapas sang Comelec Gun Ban, halin sa 19 ka mga police operations sumugod Enero 9, 2022 tubtob Pebrero 1, 2022.
Suno kay Donasco, tatlo sa mga nagkaladakpan halin sa mga ginpatigayon nga checkpoints, 13 diri ang halin sa mga kinagamo mga ginarespondehan sang mga pulis, kag isa halin sa buy-bust operation.
Nahibaluan nga ang Negros Occidental ang may pinakamadamo nga naglapas sa gun ban, nagasunod diri ang probinsya sang Iloilo nga may 10, siyudad sang Bacolod nga may 6, Aklan nga may 3, Iloilo City kag Capiz nga may tig-duha kag Antique kag Guimaras nga may tig-isa.
Dugang pa ni Donasco, hugot nga ginapatuman sang mga kapulisan ang Comelec Gun Ban kag Comelec Checkpoint sa bilog nga Negros Occidental.*
by Randy Coronel
