Nagsugod na ang pagpanghatag sang P15,000 nga ayuda para sa mga sari-sari store owners sa siudad sang Bacolod subong nga aga sang Huwebes, Setyembre 28, 2023.
Ginhiwat ang ikatatlo nga batch sang pagpanghatag sang ayuda sa mga apektado sang rice price ceiling sa ikaduha nga panalgan sang ‘Liga ng Barangay’ nga yara sa kilid sang Bays Center sa siudad sang Bacolod.
Suno kay Reginald Hudierez , DTI Negros Consumer Protection Unit Head, nagdangat sa 42 ka mga sari-sari store owners ang makabaton sang nasambit nga ayuda subong nga adlaw.
Madumduman nga nag-release ang Department of Social Welfare and Development (DSWD) Field Office VI pinaagi sang Sustainable Livelihood Program sang dugang nga P19.8 million nga balor sang ayuda para sa mga sari-sari store owners sa Western Visayas.
Tinutuyo sini nga buligan ang mga micro rice retailers nga makabangon sa kapierdehan bangud sa pagpatuman sang Executive Order (EO) 39 ukon rice price ceiling kun sa diin indi dapat maglapaw sa P41 ang regular milled rice samtang P45 naman ang well milled rice.*
