Posible nga ma-implementar sa Manokan Country ang Public Private-Partnership (PPP) agud mapanami ang lugar kag madamo pa gid sang ma-akomodar nga magakadto sa sikat nga kalan-an sa Bacolod.
Sa idalum sang PPP pagarentahan sang pribado nga kompanya ang lugar kag ini ang ila nga iga-renovate. Posible mga padakuon ang lugar agud madamo pa sang makasulod kag amo man sa pagpalapad sang parking area.
Sa interview sang Radyo Bandera kay Atty. Pacifico Maghari III, City Administrator sang Bacolod, iya ginpahayag nga nagpabutyag sang interes ang SM Group nga mangin kabahin sang Public Private Partnership kag pagarentahan ang Manokan Country nga indi magnubo sa 20 ka tuig.
Suno pa kay Atty. Maghari nga ang proposal sang SM Group ang indi lang nagsugod sa termino sang Benitez Administration kundi sa nagligad pa nga mga administrasyon nanday Puentevella kag Leonardia.
Dugang pa sang City Administrator nga nakasaad sa proposal sang SM Group nga pagahimuon duha ka panalgan ang Manokan Country, palaparon ang parking area kag iga- maintain ang manamit kag matinlo nga pagkaon.
Madumduman nga may mga reklamo gikan sa mga tenants sang Manokan Country, pigaw ang baligyaanay tungod nga dyutay lamang ang nagakadto sa lugar kag kun tyempo sang tig-ululan nagatinulo ang atop tungod sang daan nga GI Sheet.*
