Ginsuspende ang isa ka pulis sa Madhya Pradesh, India matapos magkadto kag mangayo sang bulig sa isa ka “fortune teller” ukon manugpakot agud maresolba ang iya ginakapyutan nga kaso.
Suno sa imbestigasyon, ginhatagan sang suspension order ang sub-inspector nga si Ashok Sharma matapos maglapta ang iya video kun diin makita nga nagapapakot ini sa isa ka manugpakot sa nasambit nga lugar.
Ginkonsulta sini ang kaso sang 17-anyos nga dalagita nga ginpatay sa Chhatarpur district kun diin asta subong wala pa sa gihapon nahibaluan ang “identity” sang suspek nga yara sa likod sang krimen.
Ginhatag ni Sharma sa manugpakot ang listahan sang mga “persons of interest” agud mabuligan ini nga matumod ang suspek.
Bangud sa naglapta ang video, ginsuspende sang pamunuan sang kapulisan sa lugar ang pulis bangud sa pagpakita sini sang isa ka confidential nga dokumento sa isa ka sibilyan.
