BACOLOD CITY – Ginkakibot sang isa ka pulis sang matukiban nga wala na ang iya sling bag, kun diin nakabutang ang iya pusil, sa sulod sang iya salakyan nga naka-park sa may Ayala Capitol Mall South Parking Area, Brgy. 8, sa syudad sang Bacolod sang Domingo sang aga, Agosto 14.
Ginkilala ang biktima kay Police Corporal Rannie Suelan, 34-anyos nga residente sang No. 15, Sarommar Subdivision, Poblacion 1, sa syudad sang Sagay apang wala pa nakilal-an ang mga suspetsado.
Suno sa report sang kapulisan, natukiban ni Suelan nga bukas na ang passenger door sang iya salakyan kag wala na ang iya itom nga sling bag lakip ang Glock 17 Gen 4 9mm Pistol, duha ka magazines nga may mga bala, wallet nga may unod nga kuwarta nga nagabalor sang P20,000, kag nagkalain-lain nga identification (ID) cards.
Gilayon nga ginpahibalo ni Suelan ang pagpangawat sa security personnel sang nasambit nga mall kag nagpangayo ini sang CCTV footage.
Nakita sa CCTV footage ang duha ka lalaki nga dala ang iya itom nga sling bag kag nagpalagyo sakay sang mountain bike padulong sa sidlangan nga direksyon sang dalan Gatuslao.
Matapos ang pila ka oras, nakabaton ang biktima sang tawag halin sa dispatcher sang South Ceres Bus Terminal sa dalan Lopez Jaena nga nakit-an ang iya wallet lakip sang iya identification cards sa banyo sang terminal.
Padayon nga ginapangita sang kapulisan ang mga suspek.
