Arestado ang 34-anyos nga ginapatihan nagbulos sa trono sang ginpatay nga drug lord nga si Ramy Poja sa Sitio Sibucao, Barangay Banago sa syudad sang Bacolod, takna las 5:28 sang hapon, Lunes, Disyembre 5, 2022.
Apang, antis pa madakpan si Joejan Villar, siya ang nag-gabot sang armas kag nagpalupok pa sang makaduha ka beses sa kapulisan nga magaserbe kuntani sa iya sang arrest warrant sa kaso nga paglapas sang Republic Act 9165 ukon Comprehensive Dangerous Drugs Act of 2002.
Maswerte naman nga wala maiguan ang pulis.
Gin-isyu ni Judge Amcel Leyte Mercader sang Bacolod City Regional Trial Court, Branch 48 ang warrant of arrest ni Villar nga wala sang recommended bail para sa iya temporaryo nga kahilwayan, suno sa police report.
Suno kay Lt. Col. Joefer Cabural, tagpamuno sang City Intelligence Unit sang Bacolod City Police Office sa interview sang Radyo Bandera, nakapalagyo pa si Villar apang tigayon man nga nalagas kag na-corner sang mga kapulisan.
Nakuha kay Villar ang isa ka loaded nga .45 caliber nga armas kag isa ka magazine nga loaded sang duha ka live ammunition.
Sandig sa impormasyon sang kapulisan, si Villar ang nagbulos kay Poja sa operasyon sang iligal nga druga sa lugar. Makabig man ini nga Robinhood sa lugar.
Madumduman nga napatay si Poja sa police operation nga ginpatigayon sa Sitio Sibucao sadtong Mayo 24, 2018.
Yara sa Regional Target List sang Philippine Drug Enforcement Agency-6 si Villar kay yara man ini sa city level target list. Ginakabig man si Villar nga Top 8 most wanted sang BCPO.
Nakaagi man nga may gintiro si Villar apang wala nag-file sang kaso ang complainant. May kaso anay si Villar nga murder apang ini ang na-areglo na, suno kay Cabural.
Nakahunong karon sa Bacolod Police Station 3 si Villar kag ginahanda na sang kapulisan ang kaso nga paglapas sang R.A. 10591 ukon Comprehensive Firearms and Ammunition Regulation Act batuk sa suspek.
Isa ka joint operation ang pagkadakup ni Villar sang mga katapo sang BCPO-CIU, Station 3, Regional Intelligence Division-6, City Drug Enforcement Unit, PNP-Drug Enforcement Group kag Regional Intelligence Unit 6.*
