BACOLOD CITY – Patay ang isa ka myembro sang Scout Rangers kag pilason man ang iya upod sa shooting incident nga nagluntad sa To-Lips Restobar, Purok Hollowblocks, Barangay Singcang-Airport, sa siudad sang Bacolod takna la-1:30 sang kaagahon sang Miyerkules, Nobyembre 16.
Ang napatay ang ginkilala kay PFC Edmark Iwayan, 26-anyos, soltero, scout ranger sa idalum sang 94th Infantry Division. kag residente sang Balintawak sa siudad sang Escalante, nga nakaangkon sang madamo nga kapilasan sa nagkalain-lain nga bahin sang iya nga lawas.
Pilason man ang kaupdanan sini nga si PFC Joebert Villagracia, 29 anyos, soltero kag residente sang Brgy. Hinolingan sa banwa sang Moises Padilla matapos ginbaklid kag ginlamposan sa ulo.
Nakaangkon man sang pilas sa natuo nga tiil ang tag-iya sang restobar kag classmate sadto ni Iwayan sa Scout Ranger nga si Joebert Visem, 25-anyos, kag residente sang siudad sang Sipalay.
Samtang nakaangkon man sang pilas sa natuo nga abaga ang suspek nga ginkilala kay Ulysis Carampatana, 41-anyos, may asawa, Branch Accountant sang Banco de Oro (BDO), kag residente sang Sta. Lucia Subdivision, Brgy. Taculing, Bacolod City.
Pilason man sa natuo nga tiil ang kaupdanan ni Ulysis nga si Joseph John Magahum, 45-anyos kag residente sang Sta. Lucia Subd., Brgy Taculing, Bacolod City.
Sa interview sang Radyo Bandera Bacolod kay Raquel, Manager sang restobar, nauna nga nagsulod sa ilimanan ang grupo ni Iwayan takna las-4 sang hapon, samtang takna las-12 naman sang kaagahon sang nagsulod ang indi magnubo sa napulo ka persona nga grupo nanday Ulysis.
Suno kay Raquel, matapos nga maka-order sang tig-isa ka botelya ang grupo ni Ulysis, tuyo pa kuntani sang mga ini nga magdugang pa sang order apang nagapamalibad na ang tag iya nga si Visem bangud magapanirado na sila.
Didto na nagsugod ang mainit nga argumento sa tunga sang duha ka grupo, tubtob nga naggabot sang pusil si Ulysis kag ginluthang si Iwayan.
Ginapatihan naman nga nakabalos pa si Iwayan bangud nakaangkon sang igo sa iya natuo nga abaga si Ulysis.
Samtang sa interview naman kay PMaj. Joery Puerto, station commander sang Bacolod Police Station 8, iya ginpahayag nga nagpadulong sa siudad si Iwayan kaupod ang iya buddy kag underclass nga si Joeber Villagracia agud mag-withdraw sang ila bonus.
Pagkatapos maka-withdraw, nagbisita ang mga ini sa restobar sang iya classmate nga si Joebert Visem (indi na aktibo sa serbisyo) kag nag-inom-inom.
Dugang pa ni PMAJ Puerto, sang nagluntad na ang mainit nga komprotansyon sa tunga sang duha ka grupo, nation naman nga ang buddy ni Iwayan nga si Villagracia ang yara sa guwa sang bar kag may kaistorya sa cellphone kag ini ang ginbaklid, ginlamposan sa ulo, kag nalipongan.
Nakarekober ang kapulisan sang 11 ka basiyo sang 9mm kag lima ka basiyo sang kalibre .45 nga sahi sang armas-luthang sa crime scene.
Kag narekober man ang service firearm ni Iwayan nga kalibre .45 nga may serial number nga 019596AFP.
Nakatalana nga ipaidalum sa paraffin test ang biktima kag suspek para sa dugang nga kompirmasyon kag imbestigasyon.
Ginahulat man sang Police Station 8 ang himata ni Iwayan agud mapasaka na ang kaso nga homicide batuk sa suspek.
Nagapaandman naman si PMAJ Puerto sa staff kag nagapanag-iya sang bar nga mag-aligmat kag gilayon nga mag-report sa kapulisan kun makita nga armado ang mga kostumer.
