NEGROS OCCIDENTAL – Patay ang senior citizen nga nagtabok sa dalan kag nabungguan sang tricycle sa Hacienda Ma. Cecilia, Barangay Crossing Magallon sa banwa sang Moises Padilla, Negros Occidental, takna las 7:55 kaina sang aga, Miyerkules, Setyembre 7, 2022.
Gindala sa Moises Padilla Municipal Infirmary ang biktima nga ginkilala kay Flordeliza Escaña, 66-anyos, kag residente sang Barangay Crossing Magallon.
Apang takna las 10:40 sini nga aga, siya ang gindeklarar nga patay sang attending physician nga si Dr. Lyle Love Louise Ladera, suno sa report sang kapulisan.
Sandig sa imbestigasyon, nagapadulong sur nga bahin sang highway ang Kawasaki Barako 175 nga tricycle sang nabungguan niya ang pedestrian nga si Escaña nga gulpiyada lang nagtabok sa dalan.
Ginamaneho ni Errol Alvarez, 47-anyos, kag residente sang Barangay Alianza, syudad sang Bago, Negros Occidental ang tricycle.
Natumba si Escaña kag naigo ang ulo sa semento nga dalan.
Yara naman karon si Alvarez, nga isa ka manugbaligya, kag ang iya ginmaneho nga tricycle sa Moises Padilla Police Station.*
