Sa mga ginpang utod nga puno sang Molave, Mahogany kag Narra sa kilid sang dalan Araneta sa old airport, nagrally ang katapo sang environmentalist group, tiglawas sang simbahan kag iban pa nga sector agud ikondenar ang para sa ila, wala sapayan nga pagpanghalit sa palibot agud lang mapatuman ang mga infrastructure project sa ciudad sang Bacolod.
Dismayado man ang grupo kun ngaa natigayon nga napang utod ang mga kahoy nga wala man nabalabagan sang mga opisyales sang barangay, ciudad kag mga ahensya sang gobyerno nga karon naga tinudluanay kun sino ang dapat manabat sa pagpang-utod sang mga kahoy.
Nagmandu na si congressman Greg Gasataya sa Department of Public Works and Highways nga untaton ang pag-utod sang nabilin nga siyam sa 35 ka mga puno kag magpaathag kun
ngaa ginakinahanglan nga utdon ang mga puno para sa ginadihon nga streetwalk project.
Ang ciudad sang Bacolod paagi kay Mayor Evelio Leonardia ang nagtukod naman sang joint committee agud mausisa ang natabo.
Paathag naman ni DPWH District Engineer Jaime Javellana, nag-agi sa proseso ang pag-utod sang mga kahoy kag natagaan ini sang cutting permit sang Department of Environment and Natural Resources Office sa pagpati nga ginakinahanglan mapang-utod ang kahoy bangud sang risgo para sa mga nagalinabay nga motorista kag ginaguba na sang mga gamut sang kahoy ang sementado nga dalan kag pati ang natukod nga daan nga sidewalk.
Kinahanglan man nga mapang-gabot ang nautod nga puno para sa natalana nga drainage project sa amo nga lugar.
Yara na sa custody sang CENRO Bago ang mga ginpang-utod nga kahoy.
Pero kon napunggan ang pagpang-utod sang kahoy sa Barangay Singcang-Airport, nagapadayon naman ang pagpang-utod sang mga puno sang Mahogany, Gemilina kag Lubi sa Granada-Alangilan road sa Barangay Granada.
Nalabyan pa sang Radyo Bandera ang pila ka mga trabahador nga nagapang-utod sang puno sang Mahogany sa kilid karsada.
Kadam-an sa mga nautod nga tablon, ang nakarga na sa tricycle.
Nagligad pa nga bulan sang Marso sang ginsugdan ang pagpang-utod sang kahoy.
Suno naman kay Punong Barangay Alfredo Talimodao, nag-endorso ang barangay sang resolution of no objection ukon RONO agud maka proseso ang kontraktor sang cutting permit sa Department of Environment and Natural Resources office.
Ginpaathag ni Talimodao nga nagsugot sila nga mapang-utod ang mga kahoy bangud magluwas nga wala man sang endangered species nga sahi sang kahoy kag ginakinahanglan ini para sa igapahamtang nga solar streetlights projects para sa gina-ubra nga footwalk project.
Nagalab-ot sa kapin 50 ka mga kahoy, kalabanan diri mga Mahogany kag Gemilina pati na mga puno sang Lubi ang ginsugdan pang-utod humalin sang bulan sang Marso sa Bacolod.*
Photos courtesy of Joshua Villalobos/Nico Delfin
