Natukiban na naman ang sinaku nga mga imported sugar sa isa ka “warehouse” sa Nasugbu, Batangas.
Suno sa mga agents sang Bureau of Customs, nagabalor sang 1.8 bilyones ka pesos ang sinaku sang kalamay nga natukiban sa isa ka operasyon batuk sa “hoarders” kag “smugglers” sa pungsod.
Base sa report, ginpatigayon ang operasyon sang tinalikdan nga Setyembre 4, sa warehouse sang Central Asucarera Don Pedro sa Brgy. Lumbangan, Nasugbu Palico, Nasugbu Highway, Nasugbu, Batangas.
181,299 ka mga saku sang kalamay ang natukiban sa bodega nga may unod nga 50 kilos kada saku.
Gikan sa Thailand ang mga produkto samtang ang 197,590 ka mga saku naman ang nagikan sa Asucarera Don Pedro.
Isa ini sa pinakadaku nga operasyon batuk sa mga hoarders nga ginpatigayon sang Customs Intelligence and Investigation Service (CIIS).
Ginpatigayon ang operasyon kasunod sang shortage okon kakulang sa suplay sang kalamay sa Pilipinas.
Bangud sini, napilitan ang mga retailers nga magpasaka sang presyo sang kalamay sa mga balaligyaan.
Kalakip sa mga naapektuhan sang sitwasyon amo ang mga kompanya sang softdrinks kag iban pa.
