Warning: suicide and graphic content (hungod nga wala ginhingadlan ang biktima bangud sensitibo ini nga balita)
HINIGARAN – Nagapanimaho na ang lawas sang 19-anyos nga solterito sang masapwan ini nga nagabitay sa isa ka boarding house sa banwa sang Hinigaran takna las-8:50 sang aga sini lamang nga Huwebes, Marso 16.
Ginalantaw sang kapulisan nga bangud sa gina-alegar wala pag-intiendihanay sa tunga sang biktima kag sang iya anay nobya ang rason kun ngaa gin-utas sini ang iya kabuhi.
Suno sa anay nobya sang biktima, apat na ka adlaw humalin sang nagbulagay sila kag ginpaandaman sini ang biktima nga maminsar maayo antes maghimo sang indi amo kun matuod nga palangga niya ini.
Dugang pa sang babayi, ginbulagan niya ang lalaki bangud ginhambalan siya sini nga “alpot”.
Nangabay pa ang lalaki nga magbalikay apang wala magsugot ang babayi.
Naghagaray pa nga mangape ang anay magnobyahanay apang wala makaabot ang lalaki kag wala naman ini maka-online.
Ginpahayag man sang babayi nga masami nagahambal ang anay nobyo sini nga magahikog bangud suno sa lalaki, ginatalikdan ini sang iya pamilya.
Ginapatihan nga masobra isa ka adlaw na nga patay ang biktima sang masapwan.
Sa mga naga-eksperyensya sang depresyon ukon iban pa nga mental health issues, mahimo makipag-angut sa “Hopeline” sang DOH sa mga numero nga 09175584673 ukon (02) 804-4673.
