Ginpasira na ang isa ka restaurant sa New York, matapos nga nag “serve” sang sopas nga may patay nga ilaga sa mag-asawa nga Filipino.
Nakaon na sang mag-asawa ang halos katunga sang sopas, antis nadiskubrihan ang patay nga sapat sa yahong.
Naglain ang pamatyag sang duha ka Pinoy, gani nagpaidalum sila sa medical check up.
Ginpanginwala sang restaurant ang akusasyon kag gin akusahan pa ang mag-asawa nga Filipino nga nagapanguarta sa kalan-an.
Gin upload sa social media ang video sa diin nakit-an ang ilaga nga nalakot sa iban pa nga mga ingredients sa sopas.
Suno sa mag-asawa, gin order ang sopas sa Gammeeok restaurant.
Ginbulgar man sang Filipino couple nga nag-offer ang restaurant sang one hundred dollars agud indi na magreklamo ang customers.
Nagsaka pa gid ang offer sa tubtub five thousand dollars okon masobra sa P273,000.
Wala na nagpasugot ang mag-asawa kag gin report na lamang ang insidente sa NY City Health Department.
Ginpaidalum sa imbestigasyon ang restaurant kag diri nakit-an ang mga palatandaan nga may ilaga gid man sa lugar.*
