Ginpahayag sang suspek sa pagpanglabo-patay sa mag-amay sa Purok Malunggay A, Brgy. Ilijan, syudad sang Bago sadtong Biyernes nga adlaw Abril 9 nga nagahinulsol ini sa nabuhat nga krimen.
Sa exclusive interview sang Radyo Bandera Bacolod sa suspek nga si Eleodoro Suriaga, 48 anyos kag isa ka tapasero, gin-atake siya sang iya nervous breakdown kag nandulom ang iya panulukan amo nga gulpi na lamang ini nga nanglabo.
Ginpanginwala naman sang suspek ang impormasyon nga may kadumot siya sa mga napatay.
“Ambot nano nga amo na gulpi lang naglain ang pamatyag ko. Gulpi lang nagsulod sa akon pinsar nga labuon sila. Wala man ko sang kaakig sa ila,” suno kay Eleodoro.
Nakaangkon sang madamo nga pilas sa lawas ang mag-amay nga may labo sa ila nga ulo kag kamot nga amo man ang gintunaan sang ila kamatayan.
Nagapangayo naman sang pasaylo ang suspek sa pamilya sang mga napatay kag nagsiling nga handa niya atubangon ang nabuhat nga krimen.
