Ginbawian sang kabuhi ang tatlo ka persona nga gina-alegar miyembro sang New People’s Army (NPA) sa nagluntad nga engkwentro sa Sitio Buyoron, Barangay Oringao, syudad sang Kabankalan kaina sang aga sini nga Domingo, Pebrero 5, 2023.
Suno kay Lt. Col. Van Almonte, commanding officer sang Army’s 94th Infantry Battalion, wala pa mahibaluan ang mga identity sang tatlo ka bangkay.
Dugang pa niya nga naka-engkwentro ang Central Negros Front 2 sang ginabulubanta 15 ka mga gina-alegar miyembro sang NPA.
Nagsugod ang engkwentro sang makabaton sila sang reports halin sa mga residente kag barangay sa nasambit nga syudad angut sa ginahimo nga extortions sang nasambit nga NPA.
Narekober naman sa ginluntaran sang engkwentro ang isa ka M14 rifle, isa ka kalibre 45 pistol, isa ka kalibre 38 pistol, isa ka backpack kag mga dokumento.
Sa karon nagapatigayon sila sa gihapon sang hot pursuit operation batuk sa mga nakapalagyo nga NPA.
Nagdangat naman sa masobra 600 ka mga indibidwal ang mga evacuees as of 12 noon subong nga adlaw kag naghatag naman sila sang abiso nga pwede na magbalik sa ila puluy-an ang indi naman apektado sang engkwentro.
Dugang ni Almonte, naglab-ot sa 20 ka minutos ang nagluntad nga engkwentro kaina sang aga.*
