Magapasaka ang Department of Justice (DOJ) sang kaso nga administrabo batuk sa tatlo ka opisyal sang Department of Agriculture (DA) kag mga negosyante nga imboldado sa onion smuggling sadtong Disyembre 2022, rason nga nagsaka ang presyo sang sibuyas bombay sa P587 kada kilo sadto.
Suno kay Justice Secretary Jesus Crispin Remulla, kalakip sa mga opisyal nga pagasakaan sang kaso amo sanday, Suspended DA Assistant Secretary Kristine Evangelista, Bureau of Plant Industry (BPI) Officer-in-Charge Glenn Panganiban kag Agribusiness and Marketing Assistance Service OlC Junibert De Sagun.
Kaso nga paglapas sa Anti-Graft Law kag Revised Administrative Code ang igapasaka sang DOJ sa tatlo ka opisyal bangud sa inefficiency kag incompetence sa Office of the Ombudsman.
Samtang, magapasaka man ang DOJ sang separado nga kaso nga hoarding, profiteering, falsification of private documents kag use of falsified documents ang DOJ batuk sa mga opisyal sang Bonena Multipurpose Cooperative nga sanday Israel Reguyal, Mary Ann dela Rosa kag Victor dela Rosa Jimenez.
Kampante naman si Remulla nga mabaskog kag madamo ang ebidensya nga nakuha sang DOJ prosecution panel para kasuhan sa korte ang mga nasambit nga indibiwal kag pila ka mga negosyante.
Posible man nga madugangan pa ang mapasakaan sang kaso nga may kaangtanan sa hoarding sang sibuyas bombay bangud nagapadayon pa ang imbestigasyon sang National Bureau of Investigation (NBI) sa isyu sang smuggling.*
