THAILAND – Kabahin sang isa ka relasyon ang pagpangimon. Indi ini malikawan sang duha ka tawo nga nagapalangga-anay apang indi man maayo sa relasyon ang tuman nga pagpangimon ilabi na kun wala man lang sang rason.
Samtang, pinasahi ang walo ka babayi sa pungsod Thailand bangud isa lamang ka lalaki ang ila nga bana.
Makatingala man apang masadya sila nga naga-updanay kag may yara sila sang listahan ukon pagabot-gabot kun sin-o ang magatupad sa bana sa ina nga gab-i.
Sa isa ka interview, ginpahayag sang tattoo artist nga si Ong Dam Sorot nga masadya sila sang iya walo ka mga asawa nga nagatinir sa isa lamang ka balay.
Suno sa mga asawa ni tattoo artist, mabuot kag ma-alwan nga bana si Sorot rason nga naga-inchindihanay sila.
Nakilala ni Sorot ang iya una nga asawa nga si Sprite sa kasal sang iya nga abyan kag gilayon sini nga ginhagad nga magpakasal.
Sa merkado naman nakilala ni Sorot ang iya ika-duha nga asawa nga si Nong L kag sa ospital naman sini nakilala ang iya ika-tatlo nga asawa nga si Nong Nan.
Ang ika-apat, ika-lima kag ika-anom nga asawa ni Sorot amo ang mga nakilala sini sa Instagram, Facebook kag TikTok.
Samtang sa Phra Pathom Chedi temple nakilala ni Sorot ang iya ika-pito nga asawa nga si Nong Film.
Nagabakasyon naman ini kaupod ang iya apat nga asawa sang makilala sini ang iya ika-walo nga asawa nga si Nong Mai.
Sa karun, nagabusong ang duha sa walo ka asawa ni Sorot kag may isa na ini ka anak sa iya una nga asawa nga si Sprite.
Nagakatulog ang mga babayi sa apat ka mga kwarto kun diin naga-upod ang kada duha sa isa ka kwarto.
Gindugang pa ni Sorot, sadtong ginpamangkot sini ang iya una nga asawa kun kumportable ini nga mag-asawa pa siya sang iban nga babayi, gilayon naman ini nga nagpasugot.
Madasig naman nga nag-viral ang pinasahi nga istorya ni Sorot sa Thailand kun diin madamo nga lalaki ang nahisa sa iya bangud may walo ini nga asawa. May yara man nga nagakadlaw na lamang sa ila nga sitwasyon. Suno sa mga netizens, sakit na sa ulo ang isa ka asawa, ano pa ayhan kun walo?
