BACOLOD CITY – Dakup ang duha ka mga lalaki nga ginakabig top 1 kag top 3 most wanted persons sang Pontevedra Police Station sa Negros Occidental.
Una nga nadakpan amo ang top 1 most wanted nga ginkilala kay Sany Maguad Jr., 25-anyos, sa Purok Santan, Barangay Antipolo sa banwa sang Pontevedra, takna las 3:30 sini nga hapon, Lunes, Setyembre 12, 2022.
Samtang, arestado man si Anjerico Anonat, 22-anyos, isa ka laborer, sa Purok Bougainvilla, Barangay Antipolo, takna las 4:10 sang hapon sini man nga Lunes, suno sa report sang Pontevedra Police Station.
Gindakup sang kapulisan si Maguad kag Anonat nga pareho may kaso nga Homicide.
Ang warrants of arrest ni Maguad kag Anonat ang ginpagwa ni Judge Cyclamen Jison-Fernandez, sang Regional Trial Court, Branch 63 sang La Carlota City.
May tig-P120,000 nga bailbond nga ginrekomendar ang Korte para sa temporaryo nga kahilwayan ni Maguad kag Anonat.
Nakahunong karon sa custodial facility sang Pontevedra Police Station sanday Maguad kag Anonat.*
