BACOLOD CITY – Isa ka trailer truck ang nabunggo sa warehouse sang isa ka pharmacy sa may Country Homes, Brgy. Mandalagan, siudad sang Bacolod, Huwebes sang gab-i, Enero 19.
Base sa inisyal nga impormasyon, nakabunggo pa ang trailer truck sa closed van nga Mitsubishi antes ini nabunggo sa pader sang warehouse.
Suno sa drayber sang trailer truck nga si Joefrey Boy Velasco, residente sang banwa sang Isabela, padulong ini kuntani sa Brgy. Alijis sang magluntad ang aksidente pasado las otso sini nga gab-i.
Base naman sa pahayag sang saksi, nagapundo ang van bangud magaliko ini kuntani sa Country Homes sang hinali nga nabungguan ini sa likod sang truck.
Depensa ni Velasco, yara ini sa iya nga husto nga lane kag hinay ang iya padalagan.
Gina-alegar pa ni Velasco nga ang van ang nag-agaw sang lugar kag nagbunggo sa iya, rason kun ngaa naglikaw ini kag nabunggo sa warehouse.
Wala naman sang napilasan sa mga imbolbado sa nasambit nga insidente.
Nahibaluan nga lunsay gikan sa siudad sang Talisay ang truck kag van.
Apang wala nagpa-interview ang drayber sang van.
