Magadangat sa 8 ka kilometros ang kalabaon sang underground cabling nga pagatukuron sa Lacson Street sa siudad sang Bacolod agud ang mga kable sang Telcos kag spaghetti wires ang magkaladula na sa poste.
Sa madumduman, nagpahayag si Mayor Albee Benitez nga pagtukod sang underground cabling sa siudad ang isa ka pamaagi para mahagan-hagan ang kinawatay sang kable sa Bacolod kag proteksyon man sa tion nga may makusog nga bagyo.
Sa interview sang Radyo Bandera kay Engineer Loben Raphael Ceballos, Officer-in-charge sang City Engineer’s Office nga ang underground cabling ang magasugod sa boundary sang Bacolod-Talisay tubtob sa main road sang Barangay Alijis sa idalom sang Public-Private-People Partnership (P4).
Nalakip ang underground cabling sa P5.5 bilyones nga paga-utangon sang siudad sa Development Bank of the Philippines, kun sa diin nag-alokar ang Bacolod LGU sang P300 milyones para matukod ang proyekto.
Sa idalom sang P4, posible nga pagapangunahan sang pribado nga kompanya ang proyekto kag maga-supervise lamang ang siudad ukon maga-share sa pondo ang pribado nga kompanya sa gobyerno agud masugdan ang proyekto.
Dugang pa ni Ceballos nga pribado nga kompanya ang maga-preparar sang desinyo sang underground cabling pero ini ang parehas sa nasugdan sa siudad sang Davao kag Iloilo, kun sa diin masuok ang mga kable sang telco kag may ara lamang sang manhole nga masudlan para sa maintenance sang mga cable wires.
Suno pa sa City Engineer’s Office nga mahapos ang paglubong sang kable sang telco samtang sa kable sang power supply sini ang pagatun-an pa, bangud ini ang delikado kag posible nga magbutang sa peligro ang kabuhi sang maintenance team ilabi na kun may pag-ulan.
Ginabulubanta nga masugdan ang nasambit nga proyekto sini nga tuig kag magapatigayon pa sang pagsinapol sa ma-apektuhan sang proyekto kaangay sang PRIME WATER/ BACIWA, DPWH, mga subdivisions kag iban pa nga pribado nga propiedad sa Bacolod.*
By Kabanderang Red Salgado
