Nagdangat sa walo ka mga puluy-an ang nasunog sa San Juan Street, Purok Malipayon, Brgy. 12 sa ciudad sang Bacolod, kaina sang aga, Mayo 7.
Sa interview sang Radyo Bandera kay city fire marshal Chief Inspector Rodel Legaspi, pito sa mga nasunog nga balay ang totally damaged kag isa naman ang partially damaged.
Ginsiling man sini nga nagikan ang kalayo sa ground floor sang balay nga ginapanag-iyahan ni Rudy Agravante kag ginarentahan naman sang 30-anyos nga amay nga may duha ka mga magagmay nga kabataan.
Sandig sa imbestigasyon, wala mabatyagan sang nagakatulog nga 17-anyos nga nagabantay sa duha ka mga bata bangud nagalain ang pamatyag sini dala sang iya pamulanon, nga naghampang sang kalayo ang duha ka mga bata nga amo ang ginhalinan sang sunog.
Ginabulubanta nga nagdangat sa P100,000 ang kahalitan sang sunog nga nakalab-ot naman sa third alarm.
Wala naman sang casualties ukon injuries bangud sang sunog.
Nagapahanumdum ang city fire marshal sa mga Bacolodnon nga mag-andam gid ilabi na nga tuman ka init sang tyempo sa karon.
Gintumod man sini nga tuman ka dako sang papel sang mga ginikanan sa pag-edukar sa ila mga kabataan sa mga mahimo tunaan sang sunog.*
