Ginpakamalaot ni Department of Interior and Local Government (DILG) Secretary Eduardo Año ang mga nagapalapta sang balita nga naghambal ini nga mag patuman sang physical distancing matapos makipaghilawas sa asawa ukon bana.
Mahimo suno kay Año nga isa ka pagpang-atake sa kridibilidad sang ila nga institusyon ang luyag ipalab-ot sang nagapalapta sang sala nga balita.
Ini matapos nga maglapta sa social media ang ginaalegar ginhambal ni Año may kaangtanan sa pagpatuman sang physical distancing sa mag-asawa.
Sa piyak nga bahin ginpahayag man ni DILG spokesman Undersecretary Jonathan Malaya nga paga-imbestigaran sang Philippine National Police – Criminal Investigation and Detection Group kag Anti-Cybercrime Group ang responsible sa pagpalapta sang fake news.
Dugang pa ni Malaya nga masubo makit-an nga sa tunga sang pandemya nga ginaatubang sang pungsod kon sa diin naga kinahanglan sang nagakaigo kag insakto nga impormasyon ang mga pumuluyo gina abusaran naman ini sang iban nga mga tawo pamaagi sa paghimu sang mga balita nga wala sang kamatuoran.